Лъэпкъыпсэ-хэкупсэ. Черкес Хэку

УсакIуэ, КъЧР-м щIыхь зиIэ и экономист, ГуащIэдэкIым и ветеран, Урысей Федерацэм и тхакIуэхэм я Союзым хэт, Урысейм и бзылъхугъэхэм я Союзым и Къэрэшей-Черкес хэгъуэгу къудамэм и Правленэм хэт ГЪУЭЩОКЪУЭ-ЖУМАЙ Мадинэ иджыблагъэ нагъыщэ лъагэхэр къыхуагъэфэщащ.
 
Апхуэдэу, шыщхьэIум и 14-м «Женское лицо Победы» Урысейпсо акцэм ипкъ  иту, ди хэгъуэгум и Къэрал филармонием «Память сквозь нити: живая история подвига» хэкупсэ проектым и лъэтеувэ щекIуэкIащ. А дауэдапщэм хэту бзылъхугъэхэм я Союзым и хэгъуэгу къудамэм и пашэ Борлаковэ Маринэ Мадинэ ***гъэфэщащ бзылъхугъэм и хахуагъэм и дамыгъэр — Гризодубовэ Валентинэ и медалыр.

Урысейм и бзылъхугъэхэм я Союзым мы нагъыщэм и цIэр зэрехьэ Совет Союзым и ЛIыхъужь, кхъухьлъатэзехуэ лъэрыхь Гризодубовэ Валентинэ. Ар ят хабзэщ цIыхум и ехъулIэныгъэ щхьэхуэхэм къапэкIуэу: щIалэгъуалэр хэкупсэу гъэсэным, наставничеством зегъэужьыным, унагъуэ лъапIэныгъэхэр гъэбыдэным, ди къэралым и тхыдэ фэеплъыр хъумэным ***щIа хэлъхьэныгъэм папщIэ.
 
Гъуэщокъуэ-Жумай Мадинэ жылагъуэ Iуэхузехьэ къудейкъым, атIэ ар зауэ операцэ хэхам офицеру хэт зауэлIми и анэщ. Абы и анэгум зыхещIэ нобэ ди Хэкур зыхъумэ щIалэхэм я псэ щытыкIэри, я гугъуехьри. Мы медалыр анэм и псэ къарум дэтхэнэми хуэтщI пщIэм и дамыгъэщ.

КъинэмыщIауэ, Мадинэ къыхуагъэфэщащ Есенин и медалри! Апхуэдэу Урысейм и тхакIуэхэм я Союзым и Президиумым унафэ къихьащ Гъуэщокъуэ-Жумай Мадинэ мы жылагъуэ нагъыщэр къыхуагъэфэщэным теухуауэ. Ар адыгэ бзылъхугъэм къыIэщIагъэхьэжынущ Москва къалэм дэт, литераторхэм я Купсэ Унэм жэпуэгъуэм и 3-м  — усакIуэ Есенин Сергей къыщалъхуа махуэм.

А псом и гущIыIужкIэ, зэхьэзэхуэ мытыншым пхыкIри, усакIуэ, урысей классикхэм я тхыгъэхэм и зэдзэкIакIуэ Мадинэ «Поэт года» лъэпкъ саугъэтым и номинантым и Дипломри къыхуагъэфэщащ. Абы и IэдакъэщIэкIхэр «Поэт года 2025» сборникым ихуащ.
Фигу къэдгъэкIыжынщи, Мадинэ и IэдакъэщIэкI хъуа тхылъхэм ящыщщ «Iэдииху и дыгъэ бзий», «Бзэ лъэмыж бзэрабзэ» хуэдэхэр. Япэрейм ихуащ адыгэбзэкIи урысыбзэкIи тха, ;уэхугъуэ зэхуэмыдэхэр къызэщIэзыубыдэ усэхэр. ЕтIуанэм — адыгэбзэкIэ тха, сабийхэм яхуэгъэза усэ цIыкIухэр.

Гъуэщокъуэ-Жумай Мадинэ дохъуэхъу и ехъулIэныгъэхэмкIэ! ИкIи творческэ лъагапIэхэм дяпэкIи нэсыну, узыншагъэ быдэ иIэну, и къуэ-лIыхъужьыр икIэщIыпIэкIэ узыншэу унагъуэм къахыхьэжыну Тьэм жи1э!