Л1ыхъужь лъэужьыф1э - Аргун Абубэчыр Дадым и къуэр

Социалистическэ Гуащ1эдэк1ым и Л1ыхъужь
Аргун Абубэчыр Дадым и къуэр
илъэс 110 щырикъум ирихьэл1эу

Л1ыхъужь лъэужьыф1э

Лъэпкъым и пашэ! Хэкум и гъуазэ!
1уэху лъэужьыф1эхэр къызэзынэкIа!
Ц1ыху – Гурыгъуазэ! Ц1ыху – Щхьэрыгъуазэ!
Гъуэгу угъурлыхэр тхухэзыша!
               
Псэемыблэжу, пщ1эшхуэ къыхуащ1у,
П1ат1э цIэрыIуэу дунейм тетащ.
Уагъэ дыщэпск1э уафэм щыратхэу,
Къэрал тхыдэшхуэм и ц1эр хыхьащ.

Хэку Зауэжь гуащ1эм и маф1эс гуауэм,    
Колхоз былымхэр къригъэлащ.
Зэныбжьэгъугъэр зэщигъэбыдэу,
Лъэхъэнэ хьэлъэхэм къыдек1уэк1ащ.

Архъуанэ бзаджэм лъэпкъыр щихуами,
Гъуэгуанэ бгъуф1эхэр щыпхишыфащ.
Хэкум и пащхьэм ф1ыщ1э щилэжьу,
Сыт хуэдэ 1уэхуми хэл1ыфыхьащ.

Псэк1э хьэлэлу, набдзэгубдзаплъэу,
Нып Плъыжьым щыпкъэу, фащэу щ1этащ.
Къэрал гулъытэу и гуащ1эдэк1ым,
«Л1ыхъужь» – ц1э лъап1эр хуагъэфэщащ.

Лъэпкъым и пашэ хэкулI гъуэзэджэм,
И мамыр лъагъуэм нобэ дытетщ!
Ц1ыху гурыгъуазэу, ц1ыху щхьэрыгъуазэу,
П1ат1э и жьауэм лъэпкъыр дыщ1этщ!

*Гурыгъуазэ, щхьэрыгъуазэ – интуиция, мысленная ориентировка

03.06.2026гъ.
@Гъуэщокъуэ Мадинэ

Лэжьыгъэ купщIафIэ зылэжьа, хэкум и гъуазэу, лъэпкъым и пашэу псэуа, гъуэгу дахэ хэзыша цIыхум щхьэкIэ «ЛъэужьыфIэ хъуащ» хужаIэ. «Зи ц1эр хьэрыфышхуэк1э тхауэ къэралым и тхыдэм къыхэна ц1ыхушхуэ», зи гъащIэ псор и лъахэмрэ и хэкуэгъухэмрэ ятезыухуа, зи акъылрэ зэфIэкIрэ Хэкушхуэм къыхуэзыгъэсэбэпа, пщ1эшхуэ иIэу дунейм тета, унафэщI гурыгъуазэ, цIыху щыпкъэ цIэрыIуэ - а псалъэхэр хуэфащэщ Социалистическэ Гуащ1эдэк1ым и Л1ыхъужь Аргун Абубэчыр Дадым и къуэм. Къызыхэк1а лъэпкъым и ц1ыху уардэщ, ди щапхъэщ, дызэрыинщ,  дызэрыгушхуэщ.