Пхъэ1эжьэ
=щ1ымахуэ джэгухэр=
Дадэ дэ тхуищ1ащ пхъэ1эжьэ,
Зым имы1эу жыжьэрыжэ.
Щабэрык1уэу ар лъэрыжэщ,
Емызэшыжу жыжьэрыжэщ.
Бжьэпэ лъагэр и щ1эщыгъуэу,
Уэсыр 1уащхьэу зэтрихьащ.
Ди шыпхъу ц1ык1ур ди 1эпэгъуу,
Къетшэк1ыну дыкъежьащ.
1уащхьэм лъагъуэ пхеш ди 1эжьэм,
Ар флъэгъуащэрэт зэрыжэр!
Дэ чэзууэ дыкъожэх,
Адэжынэу къыдожыхь.
Къытк1элъожэ хьэшхуэ Бацэ,
Ди гъунэгъуу блож Мамыцэ.
Дэ абыхэм дадожэф,
Дауэ хъуми датожыф.
Ц1ык1ухэ, унэм фыкъыщ1эк1,
1уащхьэ джафэм фыкъыдэк1!
Дадэ жыжьэу щытщи матхъэ,
Къэджыхьынущ къэсыху гъатхэр!
@Гъуэщокъуэ-Жумай Мадинэ
Пхъэ1эжьэ
© Copyright: Мадина Гошокова-Джумаева, 2026
Свидетельство о публикации №126042601794
Свидетельство о публикации №126042601794
Рецензии