Посвящ. на черкесском -Ц1ыхугъэм и гъуазэ

Сабийхэм папщIэ усэхэр здызэхуэхьэса «Бзэ лъэмыж бзэрабзэ» тхылъыр хузогъэфащэ Къэрэшей-Черкес Республикэм мэкъумэш хъызмэтымкIэ щIыхь зиIэ и лэжьакIуэ Айбазов Рэмэзан Мыхьэмэт и къуэм и фэеплъым. АбыкIи согъэщыпкъэ щIым псэемыблэжу телэжьа лэжьакIуэшхуэм и пщIэмрэ и щIыхьымрэ, гуащIэдэкIым ***Iа фIылъагъуныгъэмрэ цIыхубэм пэжагъ хэлъу зэрахэтамрэ, зи цIэр жыжьэ зыгъэIуа лъэпкъылIыр.
Тхылъым зи акъыл зэфIэувэ къудей нанур къыхуриджэнущ цIыхум бгъэдэлъ хьэл-щэн дахэхэр и псэемыблэж гуащIэдэкIым къызэрыпэкIуэм, цIыху пэжу дунейм тетым сыт хуэдэ къалэнри зэрыхузэфIэкIынум, зэрызыIэригъыхьэфынум.
Зи гугъу тщIы Рэмэзан Мыхьэмэт и къуэр гуапагърэ псэ къулеягърэ зыбгъэдэлъ,  дэтхэнэ лъэпкъми пщIэ хуэзыщI цIыхушхуэт. Дэтхэнэми и гур ихауэ хущытт, къыдалъхуа и къуэшым хуэдэу  илъагъут, зыри зэхэдз ищIтэкъым.
Зи ехъулIэныгъэ лъагэхэмкIэ цIэрыIуагъ ин къэзылъэща «Кубань» колхозым и унафэщI IэнатIэм зэпымыууэ илъэс 25-кIэ пэрытащ Айбазовыр. Абы и цIэр къыгуэпх мыхъуну епхащ а хъызмэтым и тхыдэм, къэралышхуэм и гъащIэм хэухуэнауэ къэгъуэгурыкIуам, 1990 гъэ ерухэм екIуэкIа зэхъуэкIыныгъэ хьэлъэхэм, экономикэм хэщIыныгъэшхуэ щигъуэтам, пхырыкIам.
 Айбазов Рэмазан щапхъэ къызэрымыкIуэщ щIым телэжьэну къыхуигъэщIа цIыхухэм, зи гъащIэ псор гуащIэдэкIыр фIыуэ лъагъуным, щIы – анэм пщIэ хуэщIыным пыщIауэ щытам. Ар пхыкIащ гуащIэдэкIым и дэкIуеипIэу хъуам, мэкъумэшхъызмэт производствэм хэлъ щытыкIэ зэмылIэужьыгъуэхэр, лъэпощхьэпохэр зэуэ зыхищIэу. Сыт щыгъуи Рэмэзан зыкъигъэлъагъуэт цIыху пашэу, гупсысэ куу, жыжьэрыплъагъ зыхэлъ унафэщIу. Абы хузэфIэкIащ нэгъуэщIхэм колхозхэм «псы щрагъэжыхьыжым», езым и хъызмэтыр къихъумэн, уеблэмэ гуащIэдэкI ехъулIэныгъэхэмкIи къыхигъэщын.
Айбазов Рэмэзан гуащIэдэкI лэжьыгъэм ***Iа фIылъагъуныгъэмрэ бгъэдэлъа унафэщI зэчиймрэ я фIыгъэщ абы и лэжьыгъэр къэрал нагъыщэ лъагэхэмкIэ: «Зэныбжьэгъугъэ», «ЩIыхь нагъыщэ» орденхэмкIэ, Урысей Федерацэм мэкъумэш хъызмэтымкIэ Министерствэм и медаль лъапIэмкIэ къыщIыхагъэщар. Ауэ езым дежкIэ мыхьэнэ лъагэ зиIэ нагъыщэу къилъытэр  — и лэжьэгъухэм, зи унафэщI гупым, къэзыцIыхухэм къыхуащIу щыта пщIэмрэ щIыхьымрэт.
Абы и щIэин лъапIэр — нобэ ефIакIуэ хъызмэтым и закъуэкъым, атIэ ар къытщIэхъуэ щIэблэхэм щапхъэ зэрахуэхъуращ. Ар и щапхъэщ фIыуэ плъагъу гуащIэдэкI лэжьыгъэм ухуэщыпкъэным, емышыж гуащIэм, щIыгум пыщIэныгъэ куу хууиIэным.
Гу зылъытапхъэщи, зи гугъу тщIа лэжьакIуэшхуэм ипхъу Борлаковэ Марини адэм къыпихащ абы бгъэдэлъа хьэл-щэныфIхэр. Iуэху зэхэщIыкI иныр Маринэ дежкIэ щIэныгъэ къызыхих закъуэкъым, атIэ и гъащIэ псом дерс куу хуохъу, жэуаплыгъэ нэс хэлъынымкIэ, цIыхухэм яхуэщыпкъэнымрэ фIылъагъуныгъэ яхуиIэнымрэкIэ, гуапагъэр къебэкIынымкIэ, ар хъумэнымрэ нэхъри хэгъэхъуэнымкIэ.
А бзылъхугъэ гуапэм, Борлаковэ (Айбазовэ) Маринэ Рэмэзан и пхъум, и адэ лэжьакIуэшхуэм хуэдэу, «КъЧР-м мэкъумэш хъызмэтымкIэ щIыхь зиIэ и лэжьакIуэ» щIыхьыцIэ лъагэр зэрехьэ, Урысейм ис бзылъхугъэхэм я Союзым и Къэрэшей-Черкес къудамэм и пашэ уардэщ.
Маринэ зытет къыхуеджэныгъэр — «Си лэжьыгъэр — Iуэхум хузиIэ фIылъагъуныгъэращ!». И лэжьыгъэм мы бзылъхугъэр пыщIащ пхуэмыIуэтэн фIылъагъуныгъэкIэ, псэемыблэж къару хилъхьэу. Ар  — унафэщI къудейкъым, атIэ икIи узэщIакIуэщ, гъэсакIуэщ, ныбжьэгъущ, лэжьэгъу щыпкъэщ. Борлаковэ Маринэ къыбгъэдэкI чэнджэщ губзыгъэхэм, и щIэгъэкъуэным я фIыгъэкIэ, цIыху куэдым гъащIэм лъагъуэ занщIэ щыхашащ, къызыхуэгъэщIа IэщIагъэр къыхахащ, апщыгъуэми, цIыху къэс хэлъ хьэл-щэныфIхэр къызэкъуригъэхын лъэкIащ.
Борлаковэ (Айбазовэ) Маринэ Рэмэзан и пхъур — уафэгум къыхэлыдыкI  вагъуэ цIуухэм ящыщщ, нэгъуэщIхэм я гъуэгур яхуэзыгъэунэхуу, гугъэ къахуэзыгъэушу.

Гъуэщокъуэ Мадинэ