Предисл. на черк. - Тхылъым ущызыгъэгъуазэ

«Бзэ лъэмыж бзэрабзэ» сабий тхылъыр «Мазэрыбжэ», «Махуэрыбжэ», «Iэпхъуамбэрыбжэ», «Плъыфэхэр»,    «Алфавит»,  «Къуажэхьхэр», «Кроссвордхэр», «Ребусхэр», «Нэщэнэхэр»       жыхуиIэ IыхьэхэмкIэ зэхэлъ усэ сборникщ. Тхылъыр тегъэпсыхьащ пэщIэдзэ классым щеджэ сабийхэмрэ еджапlэм щlыхьэным щыхуагъэхьэзыр ныбжьым ит цIыкIухэмрэ. Усэ защIэкIэ зэхэт сборникыр теухуащ псэущхьэхэм, къуалэбзухэм, къэкIыгъэхэм, псалъэжьхэм, псынщIэрыпсалъэхэм, усэрыбжэхэм.
«Бзэ лъэмыж бзэрабзэ» усэ тхылъым усакIуэр пэщIэдзэ классхэм щеджэ цIыкIухэм я бзэм зегъэужьын Iуэхугъуэм хьэлэмэту бгъэдохьэ. Сабийхэр щыгъуазэ ещI ижь-ижьыж лъандэрэ адыгэхэм къадэгъуэгурыкIуа хабзэ гъуэзэджэхэм. Адыгэбзэм удырегъэхьэх, уемызэшыжу урипсалъэну ухуейуэ уещI. УсэхэмкIэ цIыкIухэм йоущий, нэхъыжьхэм хуэфащэ пщIэ хуащIыфу. Сабий тхылъ цIыкIум мыхьэнэшхуэ яIэщ щIэблэр гъэсэнымкIэ. Лъэпкъым и гупсысэхэр, и дуней еплъыкIэр, и акъылыр наIуэу къыхощ псалъэжьхэм. Усэ цIыкIухэр Iуэхугъуэ куэдым епхами, абы я къэлъэн нэхъыщхьэр зыщ - адыгэбзэмрэ гъэсэныгъэмрэщ.
Усэ тхылъыр тегъэпсыхьащ нану шырхэм. Япэ дыдэ плъыфэхэм нэIуасэ усэбзэкIэ яхуещI усакIуэм. Iэпхъуамбэрыбжэ джэгукIэкIэ егъабжэ. Нанухэм усэбзэкIэ я гур къехьэху.
Сборникым къыщыгъэлъэгъуа усэ гъуэзэджэхэр къэбгъэсэбэпурэ сабийхэм ябгъэщIэфынущ бзухэм, псэущхьэхэм, къэкIыгъэхэм я цIэхэр адыгэбзэкIэ. Тхылъыр сабий садым, пэщIэдзэ классым щылажьэ егъэджакIуэхэмкIэ хуабжьу сэбэпышхуэщ. Адыгэбзэр джыным, хъумэным, зегъэужьыным ехьэлIа Iуэхугъуэ дахэщ сабий усэ сборникыр, икIи анэдэлъхубзэр егъэфIэкIуэным теухуауэ псалъэмакъ дахэ къыщхьэщоIукI.