Уэс щ1агъым, гъатхэпэ нэщэнэу,
Щогъагъэ, къыщок1 ажэгъуэмэр.
Щ1ымахуэм ирихыу сэламыр,
Щэху-щэхуу къыхедзэ макъамэр.
Щ1ы щхьэфэм дыгъэпс къедэхащ1эм,
Гугъэщ1эу къритыр ф1эмащ1эу,
Уэс хъарым, гъатхэпэр и дамэу,
Къыхопщ удз гъэгъахэр 1эрамэу.
Вагъуэбэр абы е1ущащэу,
Абдж щ1ак1уэм къыпхоплъыр дахащэу.
Сытхъу губгъуэр хуэхъуащи и гущэ,
Мамыру уэрэдыр хупещэ.
Джабэшхуэм и нэк1ур игъаф1эу,
Борэныр щещ1 шэчыгъуаф1э.
Мэзае диям ебзэрабзэу,
Гукъанэ псор щегъэкъабзэ.
Уэс щ1агъым гур егъэнэхур,
Дахагъым псэр егъэпсэхур.
Егъэк1уэтэжри щ1ымахуэр,
Жре1э гуапэу:"Гъуэгу махуэ!"
Губгъуэ уэс упщ1эм щылыду,
Ар изогъэщхь дыщэидэм.
Гъатхэпэ хущхъуэ! Гугъап1эу,
Ухуохъу лъагъуныгъэм и плъап1э!
06.02.2022гъ
@Гъуэщокъуэ Мадина
Ажэгъуэмэ
© Copyright: Мадина Гошокова-Джумаева, 2022
Свидетельство о публикации №122020609034
Свидетельство о публикации №122020609034
Рецензии