Анэм и мэкъамэ - си анэ щабэ, Жумай Ася и фэеплъу

Анэ жьауэр псэм и дамэщ!
Хуэдэщ насып бзум!
И пшыналъэр бзу мэкъамэу,
1эф1у къыбдожьу.

Гъуэгу нэхъ хьэлъэм ущытетми,
Мэхъур гъусэ пэж.
Дамэ дыщэм и мэкъамэу
Гъатхэм къегъэзэж!

Нэхущ вагъуэ тхьэ1ухуду,
Гущэм щхьэщымык1.
Ирипагэу, щ1ым пэлыду,
Тафэр щ1одэ1ук1!

А мэкъамэм дыщэ тхьэмпэ
Хе1ущ1ык1ыр Лъэпщ!
Анэ 1эщхьэу пхъум и напэр -
Нарт лъэнк1ап1э лъэщщ!

Шылэ щабэу анэ 1эгур
Уи псэм толъэщ1ыхь.
Жэнэтыбжэщ анэ лъэгур!
Мыух насып щ1ыхьщ!

И мэкъамэр гъуэгугъэлъагъуэщ,
Хуабэм мэхъу жыгей.
Насып лъахэм и уэздыгъэщ,
Дахэу-дэхэк1ейщ.

Нарт пшыналъэу, 1эпщэ вагъуэу,
Хуохъур Лъэпщ шагъдий.
Бзу пшынэбзэу, мамырыгъэу,
Щ1ым зыщеукъуэдий!

P.S.
Къэзгъэнэхур ди уэрамыр
Уи гулъытэращ.
Уи махуэщ1ым удз 1эрамэу,
Уэрэд пхуэзусащ.
Хущхъуэу гъагъэ ажэгъумэу,
Къысхэплъхьащ зэчий!
Схуэхъуми лъахэм шык1эпшынэ,
Уэрк1э сысабийщ.


30.01.2022гъ
@Гъуэщокъуэ Мадина

ДЛЯ АМИЛИИ сокр.вариант

Анэм и мэкъамэ

Анэ жьауэр псэм и дамэщ!
Хуэдэщ насып бзум!
Ар пшыналъэ бзу мэкъамэу,
1эф1у къыддожьу.

А мэкъамэр гъуэгугъэлъагъуэщ,
Хуабэм мэхъу жыгей.
Насып лъахэм и уэздыгъэщ,
Дахэу-дэхэк1ейщ.

Шылэ щабэу анэ 1эгур
Уи псэм толъэщ1ыхь.
Жэнэтыбжэщ анэ лъэгур!
Мыух насып щ1ыхьщ!