Афганистан - удизэхуэдэ фэеплъщ, узщ!

«Сыт щыгъуи дыгъэ къепсу щ1ып1э хуабэт»,-
Фыздаунэт1ыным и жэуапу къыватар.
Гущ1эгъу зимы1э гъэхэр блок1. Зауэжьыр гуауэт,
Афганистаным нобэ хуэдэщ щыужьыхар.

Хамэщ1ым адыгэпсэр щызынахэу,
Зи Хэку пщэрылъыр щыпкъэу зыгъэзэщ1а!
Игъащ1эк1и ныбжьыщ1эу фыкъэнахэщ,
Бэшэчыр л1ыхъужьыгъэк1э фыгъэнщ1ащ!

Фхуэхъуапсэт фыкъихьэжыну щалъхуа лъахэм,
Арщхьэк1э, фэ фыхъуащ игъуэнэмыс.
«Сыт щыгъуи дыгъэ къепсу хуабэ лъахэм»
Ебгъуанэ ротэу «Магистраль»-ыр къыфлъо1эс.

Уафэгур гъыбзэ макъым зэщ1и1этэу,
Адыгэ лъахэм хьэршыр хуогумэщ1.
Темылъу кхъаблэм бэным дэлъ сэлэтхэм,
Сабий хъарзынэхэм, къахуок1уэхэ дыуэщ1.

Къурш хэкуу адыгэщ1ым фыхуэпэжу,
Щапхъэгъэлъагъуэу, фыхэкупсэу фыщытащ!
Фи адэ-анэм псэууэ фамылъагъужу,
Ныбжьыщ1э дыдэу гъащ1эр фыухащ.

«Груз 200»- жыхуа1эр иремыщ1э ди щ1эблэщ1эм!
Армырми, тхыдэр зауэ защ1эк1э зэхэлъщ.
Кхъухьлъатэ «Тюльпан ф1ыц1эм», у1эгъэшхуэу,
И сахуэ ф1ыц1эр нобик1 ди щ1ым телъщ.

08.01.2022гъ
@Мадина Гошокова

*** «Магистраль» - Афганистаным щек1уэк1а зауэм и тхыдэм ф1ыуэ хэзыщ1ык1хэм яц1ыху 1987 гъэм щэк1уэгъуэм щегъэжьауэ 1988 гъэм щ1ышылэм нэс абдеж щек1уэк1ауэ щыта «Магистраль» операцэ иныр, ар къызэрызэрагъэпэщауэ щытар. Уеблэмэ, ц1эры1уагъ ин къэзылъэща «9 –ая рота» кинофильм телъыджэр зытращ1ык1ар а «Магистраль» операцэращ.


*** "Чёрный тюльпан" —кхъухьлъатэ Ан-12м и ф1эщыгъэц1э лейщ. Афган зауэм хэк1уэда сэлэт ц1ык1ухэр кхъухьлъатэ Ан-12мк1э кърашыжхэт. Апхуэдэ операцэм «Груз 200»-к1э еджэт.