Гьинай атанай вун...
Вун зи рагъ акIун тир, вун зи пакама,
Вун зи гур селлер тир, кьуранвай кIама...
Фадлай са хабарни амачир амма,
Гьинай атанай вун мад зи ахвариз?
Акъвазна зи вилик четин суал хьиз
Кьамир зун са сефил, авам аял хьиз.
Кьилиз къвен тийидай гъариб хиял хьиз
Гьинай атанай вун мад зи ахвариз?
Фитнеяр лишан я руьгьдин дарвилин,
ХьанатIа вун къурбан ихтибарвилин
Фенвай кьван гуьгъуьна бахтаварвилин-
Гьинай атанай вун мад зи ахвариз?
Вун гъед хьиз кьабулна,зиди цавар тир,
Вавай нур гуз хьанач- усай навар тир,
РикIяй акъуднавай, гьикьван чIавар тир,
Гьинай атанай вун мад зи ахвариз?
Писис хьиз юзазва, лагь вун вуж патал,
Винелди къведайла шехьзавай кьуд цал?
Чидач, къизгъинариз и рикIевай тIал
Гьинай атанай вун мад зи ахвариз?
© Copyright: Билал Адилов, 2023
Свидетельство о публикации №123022608969
Свидетельство о публикации №123022608969
Рецензии