Истанбул

Истанбул…хъуьтIуьн югъ ...гуьтIуь, сал гъенер,
Майдан Султанагьмет…шагьвардин юзун…
Сур чIаван кхьинар, сур чIаван къванер-
Мадни и макандиз мугьман хьанва зун...
.
Рапрапиз аквазва гьуьлерин ятар,
Рагъни иердаказ акIизва ина!
Чара тир кьатIунар, медениятар
Багърийриз элкъвена галкIизва ина.
.
Таксимдал кIватI хьана лифер алатIа,
Чир хьухь, кардик гала «Ретро-трамвай»,
Агъуз эвичIдани-ингье, Галата-
Яргъи йиферизни къведачни кьарай?
.
Сада афар гузва, муькуьда кумпир,
Яргъарай къвезва заз манийрин ванер.
Нерик галукьайла шабалтдин атир
Карагда виликай Эгейдин ценер...
.
Топкапы...гьикI сирер хуьзватIа ада,
Зурба са тарихдин, шумуд виш йисан!
Легьзеда акI жезва и тавханада
Гьелени къекъвезва Султан Сулейман…
.
Къавгъаяр, фитнеяр гьукум паталди-
Вучиз акатнава везиррик тади?
На лугьун, гьавани кьунва са тIалди,
Квекай фикирзава Роксаланади?
.
Имни Ая Софя, тIем къачу вуна-
Гелер -гьар камуна Византиядин.
Туна физ жедани, дад чир тавуна,
Къумадал ргазвай кофе Зиядин…
.
Босфордал “текнеяр” ацIанва битав,
Чайкайриз зил кьазва гимидин ванци,
Къужахда кьадайла Мармарди ЧIулав,
Чиниз туьмерзава лепейри уьцIуь…
.
Амма акI гьарайиз кIанзава рикIиз:
Дарданел галайнихъ гьала, капитан!
Хиялар катнава Гелиболудиз-
Ялзава зун руьгьди Гьажи Давудан...
Б.А. Истанбул. 23.01.2022