Са мурад ама...

       

Къарагъна гьар юкъуз экуьн яралай,
Ацукьда айвандал са кьадар чIавал…
Лап гатун цикIизни, авачтIани къай,
Адет яз вегьеда къуьнерихъ кавал...

Гьич рикIел аламач, яш гьикьван ятIа,-
Чир хьунни герек туш гила мад адаз.
Кьисметар икI хьана - гьар сад са пата,
Веледар кIваливай акъатна яргъаз.

Хиялри чIугвайла, акатда зурзун,
Са куьруь ахвар хьиз, алатна йисар…
Къванери эхзамач  цларин кьазбун,
Белки хъел галатIа - амач миресар.

Къведайди жагъизмач, гатана ракIар,
Къулак цIай кутазва, четин ятIани.
Руквади чуькьуьзва перишан дакIар-
РикIел хкизватIа ада кайвани?

Амач, амач адаз мад хажалат, гъам,
Фадлай акъатнава кIвалахар кьилиз…
Килигиз дагълариз гагь хъуьреда ам,
Гагьни михьда ада накъвар явашдиз...

Адаз вуч акунач  уьмуьрдин рекье-
КIандач гайитIани  лап и чил, и цав!               
Тек са мурад ама  кьуьзуьдан рикIе :
Мукьвал хьун фидай югъ, кIанидан патав…

         

*кьазбун-сувагъ (штукатурка)