Къимет це...

Гардан кIирмир вуна четинвилериз,
Абур вилик къведа  белки гьар юкъуз,
КIандатIа  атана  бегьер гъилериз,               
Алахъа масадан рекьериз нур гуз!

Акурла хъел къвемир, кьабула вуна
Кьиле затI авачиз фурсар гудайбур,
Чир хуьхь, тIимил авач пайдах такьуна
Халкь патал секиндиз шем хьиз кудайбур.

Гьа икI ваз чир жеда гьахъдини нагьахъ,
Гьарамди, гьалалди-  вуч  я тафават...
Кьулукай якIв ягъун хьайиди туш чахъ,
Чин- чинал дуьз лугьун -кьегьалдан  къуват!
 
Къимет гуз алакьа гьар садан кардиз,
Ваз дердер гузвайдан гъил гъиле  кьамир.
Акьулдив фикирна ша вун къарардиз,-
Нажахдиз килигна  тарцин рикI хамир.

Ракъуриз тахьурай йисар бадгьава-
Уьмуьрдин яргъивал садазни чидач  .
Пун квачир мурадар  амукьда цава ,               
Эхир  пашманвили  хийирар гъидач.
               

Килиг,гьар кIвалахда ава авсият,-
Себебар авачиз  нетижа  къведач.
Уьткемдиз вегь камар, саф ятIа  ният-
Къенин югъ галачиз пакаман жедач !