Къуват кумач захъ

   

Ни ваз вуч лагьанва, гьибет авунва,
Закай вуч ван хьанва, писвал акунва?
Килиг  зун гъавурда гила акьунва -
Агудна жувавди тапархъан, ялахъ,
Хажалат гумир на, къуват кумач  зак!

ЦIалцIам тир рекьерай  хандакI акъудиз,
Вучиз давамзава зав гъам агудиз?
Хирер сагъ хъжезвач –хамар алудиз
Лугьумир, къван я вун -туькIуьдач  цлахъ,
Хажалат гумир на, къуват кумач  зак!
 
 
РикIевай муркар зи кукIвара, цIура,
Кани тир нурарив  мичIер ацIура!
Эвел зи тахсир лагь, ахпа тур сура-
Чир хуьхь чара ийиз гьахъдини нагьахъ,
Хажалат гумир на, къуват кумач  зак.

Мягькемиз алахъин мадни авсият,
Сафди я эхир чи кьведанни ният,
Бес тушни са рикIиз икьван  азият!
КIаниди кIанидан жедачни чIалахъ?
Хажалат гумир на, къуват кумач  зак.

 
Шербетдин чкадал  гуналди зегьер,
Алатдач зун валай, эхда са тегьер…
Вун авач- дар я заз авадан шегьер,
КIаниди лагьана  мадни  зи тIвар яхъ,-
Хажалат гумир на, къуват кумач  зак…