Гагь кIанда заз

Гагь кIанда заз са гар хьана,
Къекъуьн  жуваз  ина –ана…
Кьакьанрилай килигдайвал,
Хуш авазрал илигдайвал…
ДакIар гатаз, рак ахъайиз,
Мугьман жеда зун гьар  кIвализ,
Къуватдикай пай гуда за,
Хушбахтвилин цIай куда за!
Юзурда за тарар, векьер,
Зулун кьиляй  хъипи  пешер-
Къугъвадайвал  са гьавада
ЧIугваз шикил   гьар навада!
Цуькверикай кIурукIар къаз
Тухуда за жувахъ галаз,
Гуьлуьшан чIур кутада за,
Чуьллерик нур кутада за…
Мажбурда гьа цавун цифер,
Тухардайвал къарих чилер,
Рапрапиз хьуй  кьеженвай рук,
Хвешивиляй  амачиз  руг…
Лап яргъара ,океанда,
Елкен чIугваз, ял тваз танда,
Куьмекдачни  луьткведиз са-
Секинарда лепеяр за!
******
Гагь кIанда заз  цIайлапан жез,
Нур  гудайвал хъуьрез – хъуьрез,
Къайибурув  чим агудиз,
Душман жеда зун  агъудиз…
ЧукIуриз  дерт, атIуз суза .
Шадвал гуда виридаз  за!
Падиз кIанда чIулаввилер-
Экуь ийиз мичIи йифер!


******

Гагь заз дагъдин  вацI жез кIанда,
Са кьегьал рикI   туна чанда,
Шагьсувалай тIем къачуна,
Алпандивай шем къачуна,
Шалбуздилай авахьда зун,
Кьулан вацIук акахьда зун!
Лугьумир гьа, « вун я  батIул!»,-
Дегишарда  за адан тIул!
Квадарнава  вичин абур,
Бес хьаначни авур сабур?
Кьерер , цацар  лугьун тийиз ,
Алахьрай лап  пехъиди хьиз,
Хабар гурай   сур къатарай,
И патарай, а патарай,
Тахда хьурай иви къугъваз-               
Виликан руьгь хкирай чаз!

                08.02.2019.