Па вадзе расходзяцца кругі.
З’ела цемра рэчкі берагі.
У цішы начной я варажу,
На ваду з надзеяю гляджу.
Чорны колер, вір у віры.
Лёс схаваны да пары.
Зоркі яркія гурбой
Назіраюць за ракой.
Сцежка свету на вадзе
Напрасткі ў вір вядзе!
Чорны колер, вір у віры.
Лёс схаваны да пары.
Цяжка дыхае рака.
Ночы вязкая смуга
Сцеле морак над вадой,
Ноч яднаючы з бядой.
Чорны колер, вір у віры.
Лёс схаваны да пары.
Круціць, верціць вір кругі.
Бераг тут, а там другі.
Маладзік, як абярэг.
Забяры, рака, мой грэх!
Чорны колер, вір у віры.
Лёс схаваны да пары.
Ружавее небасхіл.
Моц губляе першы вір.
Бачны сталі берагі.
Заціхае вір другі.
Сонца кола ўгары.
Не адкрылі лёс віры.
***
P. S. Oleg Sovothy https://suno.com/s/mCvmS6GXTXnYEbnr
Вiры
© Copyright: Ивета Витко, 2026
Свидетельство о публикации №126080407747
Свидетельство о публикации №126080407747
Рецензии