Лъимерлъидул лъалкIал

Лъимерлъидул лъалкIал
                I
АнцIила цо сонилъ бох бекана дир,
Бана буснив вегун кIиго моцIгIан мех.
КIалбиччанкъо щвана. КъвачIаги босун,
Росулъ гьеб байрамалъ кIвечIо сверизе.

РачIана гIелцоял дихъе раккизе.
Калам дагь гьабуна, тургьби чIехьана.
Гьуинлъабазул гьеб гъонолъ дунги тун,
Тазалъи дий гьарун, ана гIолилал.

ГIемер цебе чIола дида гьеб лахIзат,
ХIилла-рекIкI лъаларел ракIазул лъикIлъи.
…КIудияв гIунагIан, гIисинлъула чи,
ГIакълу цIикIкIанагIан, гIадаллъула чи.

Лъимерлъидул ц\илъи, бацIцIалъи ана,
ЦIакъ ишалъул чагIи руго ниж гьанже.
…Гьадинго дунялги: чIахIиял чагIаз
ГIумру чIвалеб буго лъималгун цадахъ.

Берцинаб тIабгI анищ нужей, кIудиял,
Дунялалъ хъублъичIеб лъимадул гIадаб.
Гьезул гIакълу анищ нужей, пакъирал,
Пана гьабичIого тезе гьаб дунял.

ХIажат буго базе чIахIияцаги
Цоцазде кидаго цохIо гьудуллъи,
Адамилгун ХIавал лъимал ккола нилъ,
Инсан камичIого – вацалгун яцал.