***

-Вуч хабар ава, мешеди?
-Ви сагъвал.
-Тlимил - пара мадни?
-Газет къачунва гьажи Эгьмедани.
-Ваз вичиз акунани къачурла?
-Гьакl лугьуз ван хьана заз.
-Акl ятlа гьамни шайтандин рекье гьатнава,
Дин - иман негьна, кафир хьанва.
М.А.Сабир( подстрочный перевод зиди я)

Са асирдалайни гзаф вахтар алатнава, тарих тикрар хъжезва:

   -Вуч я, гьикl я, лагь кван, гьажи,
Цlийи хабар авани?
Зун инара авачирла,
Са вакъиа хьанани?
   -Авач ахьтин гъариб хабар,
Авач цlийи са затlни.
Ваъ, ава сад...элкъвенава
Диндихъ мад са газетни.
   - Им вуч хъсан хабар хьана,
Махлукь къвезва акьулдал.
Авач лугьуз цlийи хабар,
Ийимир на такьурдай.
   -Кафир лугьуз къуьнуьд - къуншид,
Тавуй лугьуз вичиз себ.
Кьурбанд гана кесиб Алид,
Авай тек са дамаз хеб.
   - Ай машаллагь, машаллагь хьуй,
Аллагьдинни амандал.
Вуч хъсан я, хквез ава
Чи халкь диндал - имандал.
   - Хабар яни Режебкай ваз?
   - Вуж я, ам гьи Режеб я?
   - Буьркьуь хьанвай, дин кваз дакьаз...
   - Рикlел гъана ажеб на.
Вучна мадни, вуч гъалатlна,
Кафирдин хва кафирди?
Авачни са хва, адан сив
Гъутув яна ифирдай?
   -Ваъ, акьулдал къвезва гьамни,
Теблигъзава исят дин.
Кьвед паб ава, пудлагьайди
Жагъуриз я нубатдин.
   -Машаллагь лагь, машаллагь лагь,
Турусбур хьуй хабарар.
Хъсан къвезва ви авазар,
Эгер туштlа тапарар.
   - Мектебдакай хабар гун за...
   -Ана гьикl я, лагь, гьалар?
   -Чаршаб алаз къвезва гила
Тарсариз, руш аялар.
Дидед чlалан тарсни амач,
Хьанва чирун асан дин.
Ушколайрай къвезвайд гила,
Пак сесер я азандин.
   -Акl хьанатlа хкведа мад ,
Дуьньяд крар чкадал.
Буьркьуь жеда гьар сад, диндин
Илимдакай хкатай.
31.05.2026