Сабырлыкъ,
сен тюйюл эсенг да нёгерим
мен билеме…
Билеме…
Билеме ойлай.
Орамгъа къарадым да,
ачыкъ жюрегим
къууанды,
сабийле бла
тургъанча ойнай.
Ышарама,
эркинди
терен солуум,
Ахтыныу –
къарыусуз жанланы амалы.
Мен кеси кесиме
мурдорум,
тамалым,
ахырсызды,
чексизди
кючюм-къарыуум.
Сабырлыкъ,
сен тюйюл эсенг да нёгерим.
Мен барама.
Барама алгъа жаннганлай.
Къарангы кечеде
бар арсар
сагъышны,
къыйналсам да,
къоркъсам да
билеме хорлай.
Сабырлыкъ,
бюгюн мен
шошлукъну иеси,
ингирни салкъыны
терекле бла ойнай.
Бар Жерде болгъаннга
нюр тёге
Кюн кеси,
Ачыса да кёзюм,
мен турама
къарай…
***
© Copyright: Амина Газаева, 2026
Свидетельство о публикации №126051608117
Свидетельство о публикации №126051608117
Рецензии
