Боран уллу тереклени
жыкъгъанды,
гитчге гюлню уа
унутуп къойду.
Бирде
ол гюлча
къарыулу болгъанма,
бирде уа,
гюлча
къарыусуз болдум.
Жазгъы жауун а
дунияны жууады.
Аны тамычылары
манга тие.
Керекмейди
чурукъ да,
салкъынлыкъ да
женгил жыйрыкъчыгъым
манга жетер.
Керекмейди
къына,
ёзге бояу да,
жазгъы жауун,
сен аланы кетер.
Ариума мен,
ариума акъ умутча
Умут а
кечени да
кюн этер.
Жазгъы жауун бла
орамны барама,
мудахлыгъым
жарыкълыгъым бла тенг.
Жиляймыды,
жырлаймыды –
сурама.
Жауун кеси да билмейди
неден…
***
© Copyright: Амина Газаева, 2026
Свидетельство о публикации №126051608047
Свидетельство о публикации №126051608047
Рецензии
