Азаплыкъ сынагъан таулу миллетиме
Акъ кёлекчикде
акъ къагъытха сала къол,
айтады биреу
къазауатха –
бол!
Акъ жабыу бла
жууургъанын тышлап,
ышарады тиширыу,
уу
ашатхан эрине къарап.
Акъ умутларын
къабыл болуп кёрюрге,
барадыла адамла
бир бирлерин
кёмерге.
Бийик тауланы,
акъ бузланы ичинде,
турадыла къатып,
табийгъатха
бой бермезликле.
Къара халкъны
къара ишден
къаралгъан къоллары!
Ол къоллада
къара ызлыкъла –
халал къыйынны жоллары.
Къара жерден а
кюннге
созулуп ёсген –
Олду
битеу барыбызны
кечиндирген.
Аны кибик,
ананы къарынында
ёседи сабий
тогъуз айны
юч къарангыда.
Кечени къара жабыуу
бере адамлагъа
хошлукъ.
Жазыучула уа
«чыракъ жандырып»,
Эдисонлагъа
этедиле буйрукъ.
Акъмыды акъ?
Къарамыды къара?
Акъмыды акъ?
Къарамыды къара?
***
© Copyright: Амина Газаева, 2026
Свидетельство о публикации №126051404163
Свидетельство о публикации №126051404163
Рецензии
