Ой анам,
къарангымы боллукъду кече?!
Булутла жапдыла бийикни.
Гюняхлы дуниядан
гюняхсыз жан кёче,
тёгюледи къаны кийикни.
Сен мангамы келген эдинг,
уучу, бир айт?!
Нек тураса былай кериле?
Шо сенсиз да тамамды!
Ызынг бла къайт!
Бёрюле,
бёрюле,
бёрюле!
О Аллах!
Сынадынг деп тарыкъмайма мен,
бу къыйын,
бу къатыш кезиуде.
Кесимими кёреме?
Манга кюзгюден…
биреулен…
сууукълукъ кёзюнде
О бёрю жыйыным,
нек къаршыбыз былай,
бузлагъанча мени жюрегим?
Мен кеси кесимими
турама хорлай –
жютюле
болдула
тишлерим.
Сабырлыкъ!
Къоруула мудахлыкъ жырымдан,
тынчлыкъны,
шошлукъну билейик.
Ол уучу да,
бёрю да,
кийик да болгъан –
мен кесимме,
кимдеди терслик?..
***
© Copyright: Амина Газаева, 2026
Свидетельство о публикации №126051404037
Свидетельство о публикации №126051404037
Рецензии
