Узакъда, узакъда
мен кёрдюм бир отну жарыгъын,
мен барама анга,
къарыуум да,
кючюм да къуруй.
Боранда баргъандан да къыйынды
жангы атламым,
мен барама анга,
сууукъну бла желни унутуп.
Ийиси да келе,
тансыкълап ол отну жылыуун,
бусагъат жетерикме деп,
бир къарасам а узакъ –
зат да жокъ.
Сындырады жашау дегенни алдауу!
Кёк – къаппа-къарангы,
жер – сууукъ,
чыммакъ акъ,
чыммакъ акъ.
Ах, артха – ызыма къайтыргъамы
керекди манга?
Да къайтсам, хорлатсам,
мен сатмазмамы умутуму?!
Жокъ башха амалым,
атларыкъма жаланда алгъа.
Узакъда,
узакъда
табарыкъма жаннган отуму.
***
© Copyright: Амина Газаева, 2026
Свидетельство о публикации №126051304119
Свидетельство о публикации №126051304119
Рецензии
