***

Сау кюнню жауун жаууп турду.
Бир тохтамады, къаллай бир сакъладым эсем да.
Тамычылары терезеге урулгъанча, мен да алай
сууукълукъгъа, къарангыгъа урулама…
Жандауурлугъ’а жокъ…

Биягъы ол...

Эрттеден бери бир бирни кёрмегенча…
Сейир окъуна этеме – бу адам мени жашауумда…
Къайдан?..
Къалай?..

Не бек кюрешсем да, шёндю эсиме тюшюралмам.
Ол а, кёзюме къарап тургъан болмаса, зат да айтмайды, –
чычхан марагъан киштикча.
Да нек къыйналады сёлешип-жаншап? –
Бюгюннгю кюн – анга байрам: биягъы мен
ол айтханча болгъанма…

Ышаргъанлыкъгъа уа…
Кёзлеринде – жаханим оту,
бир затха да жан аурутмай,
кюйдюрюп кетерик от.
Нек болгъанды бу быллай? Не заманда?
Биринчи кере сындыргъанларындамы?
Огъесе шёндю, сатхычлыкъны бла
кёзбауну кючюн кёргендеми?
Неда бир кезиуде, хорлатып,
тазалыкъ, адамлыкъ да
жокъдула дегениндеми тюрленнгенди быллай?

Кёпдюле соруула,
алай шёндю жаланда бири къыйнайды эсими:
«Да терсмиди ол?»
Хар затны да кёрюп тургъан,
мен ангыламагъанны да ангылагъан,
керекмиди анга кимге эсе да жарсыргъа,
кимни эсе да кечерге?
Ол биледи биреуге этген игилиги къайтмазын,
къайтыргъа керек болмагъанын да биледи ол.
Игилик этип, суугъа атып кетерге уа энди
аз да жокъду къарыуу.

Мен а…
Мен да тюйюлме мёлек, алай билеме:
бу дунияда тазалыкъ, халаллыкъ да бардыла.
Кёкню къара булутла басып турсала да, тиеди кюн.
Хорлагъан а – кючлю угъай,
адамны да, Аллахны да аллында тюз болгъан хорлайды.
Ол ийнаныу болушады манга,
эрттенликде туруп, алгъа атларгъа,
ауур сагъышдан къутулургъа,
башымы тюз тутуп барыргъа;
башхалагъа сукъланмай,
кесимде болгъаннга къууаныргъа,
жюрегими къыйнагъаннга, унутмасам да,
дерт тутмазгъа.

Ол ийнаныу болмаса, бармыды жашауда магъана?
Алай, бир бирден айырылыргъа бизге онг жокъду.
Къайда да ол мени къатымдады, менден
артха къалмай, биргеме келиучюдю.
Алай, Аллахны, адамны аллында да – мен кесим,
этилген ишле ючюн,
толмай къалгъан муратла ючюн да…
Жангызды адам, жангыз,
ол къатынгдан кетмей тургъан окъуна,
къарангы отоугъа кирсенг, жарсымаз,
къояр да кетер…
Сен а жаланда ийнаныуунг бла бирге...

Ол «эгизинге» уа, зат айтама десенг да, не айтхын?
Ол жаланда ауанады.
Мени ауанам…