Гатфарин йиф.Хкатна марф.
Къанва гьава, кутаз зурзун.
Къуьнерилай вегьена шарф,
Ахвар квахьна, къекъвезва зун.
Вацран мич1ер.Аквазвач зат1.
Атирдин ни ийизва гьисс.
Апрелд эхир.Гьаданд я хат1,
Геж атана ц1инин и йис.
Т1ебиатди къалаз гьайбат,
Гежералди къурна живер,
Хъуьт1уь,вахкун тийиз нубат,
К1вадарнава машмаш цуьквер.
Вири к1вахьнач, авур дурум
Са паюни кьунва емиш,
Тавурт1а мад къаю зулум,
Кьве вацралай жеда дигмиш…
Акьалдарна чилел, ятар ,
Я Сад Аллагь,вуч тир тахсир,
Барбат1арна к1валер-йикъар,
Вуч паталди я чаз таьсир?
Гъуцар, рагъ, варз, гъетер к1ват1ал,
Ризкьидикай ат1умир пай,
Гунагьарин шеле к1улал
Алайбурун жемир ман, тай!
Уьмуьрар чахъ амач яргъи,
Секинсузди я яшайиш,
Чилер, цавар жемир аси,
Гунагькарриз ая багъиш!
Апрель 2026
© Copyright: Джарият Магомедова, 2026
Свидетельство о публикации №126050702868
Свидетельство о публикации №126050702868
Рецензии