Вун са миск1ал я, зи къилих,
Зун вал гагь-гагь жезва мягьтел.
Зи къаст туш вак кутун синих,
Амма вакай къвезва заз хъел.
Гагь жезва вун дердерин гьуьл,
Гагь вун къайи мурк1адин дагъ.
Фараш ийиз бубуйрин чуьл,
Гагь жеда вун чим гузвай рагъ.
Гагь вун дагъдин булах жеда,
Ширшир ийиз авахьзавай.
Гагь ч1ижерин мулах жеда,
Вирт п1узарлай алахьзавай.
Бугъ алахьиз, ргаз жеда
Ц1аял алай къажгъан хьтин,
Уф алахьиз дак1ваз жеда,
Самар тунвай бажгъан хьтин.
Гагь вуна зун хуьда харуз,
Нинияр гвай гъвеч1и руш хьиз.
Гагь акъудда на зун цавуз,
Лув гуз къаних, симург къуш хьиз.
Тавуна ваз авач чара,
Рик1и гайи ч1авуз буйругъ.
Са гъуд кьвандаз, авай хура,
Гьазур я вун ийиз къуллугъ.
Зи къилих
© Copyright: Тамила Хуршидова Салманова, 2026
Свидетельство о публикации №126050104906
Свидетельство о публикации №126050104906
Рецензии