Дицаго хоб бухъун, мусруги жемун,
Жанив вегун хвезе хут1анин ккана,
Дидаги лъаларев, дунги раг1ич1ев,
Шаг1ирил кеч1алъул маг1на бич1идал.
Амма, дир г1елцоял, г1едег1унге нуж,
Нилъеда цеве ч1ун г1емер чи вугин.
Лъималазул лъимал нилъер г1умройин,
Гьабилин гьеб халат, херлъиги бахчун.
Хъах1лъараб бет1ерги, къулараб мугъги,
Гьел г1илаби гуро г1амал хисизе.
Паспорталда бугеб тарих к1очон те,
Каранда к1ет1олеб рек1ехъ г1енекке.
Г1умроялъул т1аг1ам т1аг1анин абун,
Абуге нужоца, рахъуге г1арзал.
Керен борхаразде цо-цо бер къинк1е,
Бегьулин нилъее, гьебги даруйин.
Рек1ел хиялазул ч1ч1вабзазда к1ут1ун,
Щвезабе рак1алде ах1арал куч1дул.
Щибаб къойил цинги лъадул кверги ккун,
Щуре екьулилан, г1инт1еги къулун.
2024 г. Ростов-на -Дону
Дицаго хоб бухъун
© Copyright: Камал Абдулвахидов, 2026
Свидетельство о публикации №126042608701
Свидетельство о публикации №126042608701
Рецензии