Сагъ туш зи рик1

" Ви рик1 сагърай"
Э. Гуьлалийрин.

Сагъ туш, шаир, сагъ туш зи рик1,
Къеняй кукра хъехъзава ам.
Къведайдавай жезва назик,
Шам хьиз ц1ураз шехьзава ам.

Дуьньядавай пехъивилер,
Илив тежез дерт жезвайди,
Тараш -чапхун, яргъи гъилер,
Акур ч1авуз перт жезвайди.

Фугъарайрин ч1угваз гьайиф,
Куьтягь тежер юртавайди.
Шадвал квахьна жезва зайиф,
Яста гьатна мурт1авайди.

Яд чилерал фейт1ан женгер,
Кьуркьушумдин хуравайди.
Ватан патал чан гай аскер,
Кучуднавай суравайди.

Баладин т1вар эзберзавай
Дидед рик1 хьиз гъарик1 я ам
Умуд амаз эверзавай,
Адан рик1ив шерик я ам.

Гугрумрин ван атай ч1авуз,
Хкаж жез ам алукьзава,
Уьфт кьилеллаз физвай цавуз,
Ракетарни галукьзава.

Са чил кьат1на юкьвай физвай,
Цацарини чухвазва ам,
Раж алачиз, нагьахъ къвазвай,
Харарини гатазва ам.

Са паччагьлугъ тахьай вичиз,
Халкьдин шеле пар хьайиди.
Элекьардай дарман течиз,
Хурун кьефес дар хьайиди.

Ихтибардай аватнавай,
Бязийрин хьиз чиркин туш ам,
Пуьнуьгдилай алатнавай
Дуьнья акваз секин туш ам.

Закай хьанва Къванцин гада ,
Амукьайт1а жафа я ик1.
Гьикьван гагь за давам гуда?!
Сагъ туш, шаир, сагъ туш зи рик1.