На раздарожжы

НА РАЗДАРОЖЖЫ
леанід ПРАНЧАК

ТРЫЯЛЕТЫ
ДЛЯ ПАНІ Т.

1.

Калі б я знаў, што гэта Вы былі,
Усё было б не так, было б іначай.
Цяпер душа, знявераная, плача...
Калі б я знаў, што гэта Вы былі!
Сустрэцца зноў ці выпадзе калі?
Здаволюся спагадаю лядачай.
Калі б я знаў, што гэта Вы былі,
Усё было б не так, было б іначай.

2.

Я ўсё аддаў бы, каб не страціць Вас.
Вы тая, хто душы наканаванне,
Любові і пяшчоты прадчуванне,
Я ўсё аддаў бы, каб не страціць Вас.
Ды я не знаў!
Які жахлівы час!
Пякучы жаль і горыч шкадавання.
Я ўсё аддаў бы, каб не страціць Вас.
Вы тая, хто душы наканаванне.

3.
Я страціў Вас, я Вас не распазнаў,
Такую непадобную на іншых.
Цяпер мой лёс пусты і нікудышні.
Я страціў Вас, я Вас не распазнаў
Усё было б не так, калі б я знаў!
Я не пачуў, што мовіў мне Ўсявышні...
Я страціў Вас, я Вас не распазнаў,
Такую непадобную на іншых.

4.

Здараецца такое толькі раз:
Абставін збег альбо дарунак Божы.
Выпадак таямнічы і прыгожы.
Здараецца такое толькі раз.
Мне не хапае Вас цяпер якраз,
Калі душа мая на раздарожжы...
Здараецца такое толькі раз:
Абставін збег альбо дарунак Божы.

21.04.2022