Чархи - фелек, къалгьур жуван керемат,
Рикl дурумсуз имандикай хуьх вуна.
Адалатсуз крар акваз дуьньядин,
Ажуз жезвай амандикай хуьх вуна.
Агакьдалда ви гъил гьардахъ, вириник,
На агудмир гишин тухдин кlириник.
Куткуз тахьуй тlурус тапанд шериник,
Буьгьтенчидин гимандикай хуьх вуна.
Зазни чида вири къвеч са уьлчуьдай,
Ава ваз саф, пис - хъсанди кьечlедай.
Дяве ийиз багьна маса къачудай
Инсандин лап ямандикай хуьх вуна.
Амалдачир эцигнавай шартlариз,
Хаянатдай юлдашвилиз, дустариз,
Пай хъийирла дяве жезвай, хуртlариз,
Уртах галай хармандикай хуьхь вуна.
Куьмек кlандач заз имидвай, халудвай,
Душмандилай кар за жува алудда.
Чиниз хъуьрез, фур эгъвезвай далудкай,
Дуст лугьузвай жувандикай хуьх вуна.
Са гъвечlи халкь яз ава чун чилерал,
Ягъид пара туш кьуна чун хьелерал.
Чlар кьван ама чlални хъфиз гъилерай,
Чун и эхир замандикай хуьх вуна.
17.01 2026
***
© Copyright: Намик Фарзалиев, 2026
Свидетельство о публикации №126022302000
Свидетельство о публикации №126022302000
Рецензии