Жаш шайыр

Байтуугъанланы Исмаилны Жазыучула Союзуну таматасына айырылгъан заманда жазылгъан назму

ЖАШ ШАЙЫР

Байтуугъанланы Исмаилгъа

Чегемли жаш Исмаил,
Сен керти да жаш шайыр.
Жаш болсанг да, баш болдунг,
Кёпле эслерин бурдунг,
Асыры жашды дейле,
Жашлыкъ кючюн билмейле…
Мен а къарс урдум санга,
Сукълана жашлыгъынга!
Сундум сени саугъагъа
Аллах берген саулагъа.
Жарата къылыгъынгы,
Керти адамлыгъынгы,
Мен эс бурдум фахмунга,
Сени ариу хатынга.
Кир къондурмай атынга,
Жарарса дей халкъынга.
Бирле излей сылтаула,
Быллай сёзле айталла:
«Бирда бек жютю кёзю,
Кёкге жетеди сёзю,
Бек ётгюр, тири, чёрчек,
Болмаз ол эталмаз чек», –
Дей сёзлерин къатлайла,
Сёкген суна махтайла.
Кёрюрге керек затны,
Узакъда да кёресе,
Хар бир сёзню багъасын,
Кимден да иги билесе.
Болсада эслеп атла,
Тёгерекде кёп отла.
Отха кирме, бюгюлме,
Жаугъа кючсюз кёрюнме.
Ёрле, Исмаил ёрлеге,
Олтур сыйлы тёрледе,
Кюч бере жашлыкъ кючю,
Бол, Къайсын кибик киши!

Зумакъулланы Танзиля,
Къабарты-Малкъарны, Къарачай-Черкесни да халкъ поэти, РСФСР-ни М.Горький атлы къырал саугъасыны лауреаты.