Бевель суботакри

Рипирав дадывэс э бевель суботакри:
Рапаняса, марэса, бэткенца кхандэлас,
Кэ авлын сыс ноябрё, погода миглякри,
О шукэ патриня э каштэндэр пэрэнас.

Про канапо ковло сыс пашты парны мыца
Кирмалэ э порьяса, тхулэ пашварэнца.
Якха фрэнтэс пхандя, лошалэс мурчинэлас,
Думии хай палэ кангалы э мирана.

Пирдал калоро тхувало о тэглытко
Уинэлас э осень рундлэ е гиляса,
Яниндой Суомэндэр привето илытко,
Одолэстэр рундём бахталэ ясвиняса.

Э дрэ чэка авья тыкнэдыр мри пхэн Андра,
Ман ковлэс тасаи э дуе васторэнца,
Екх гудлы лэиндой мандэр на пхучи дажэ,
Ёй тходя пэ яг трумуля э чарорьенца.

Пашо кхэр дудана жутонэса хачонас,
Чон пхэрдо тугвалэс дрэ чувина дыкхэлас,
Бичибакрэс пхучэлас, соскэ бут сы опрэ
Чэргэня, ёв уса екхджено, биирьякро.

Мэ камамас о свэнко т’авэл сыгэдыр ёв,
Жакирдэ трин бэрш иди свэнкитка дро шкапо.
Сыс э мандэ надея, мэ патявас дро ди,
Кай амэ кхэтанэ всаекх сыго аваса.