ЁЛЮМ

ЁЛЮМ

Хар инсан да этеди сагъыш,
Хар инсан да этеди алгъыш.
Заман а бурулады алай,
Санга кюле, масхара къарай.

Жашау этген кетеди кёрге,
Анда къол узатмазса ёрге.
Умутларынг къалырла жерде,
Сенден узакъда, алам кенгде.

Ачыуу бла келеди ёлюм.
О ненчагъа ачыды кёлюм!
Къалырмы бу жерде файдабыз?
Жаннетде жатармы жаныбыз?

Хайыр тюшюргенбизми мында?
Билек этгенбизми адамгъа?
Жаш болуп, къарайма ызыма,
Сагъыш эте, чыгъа жолума.

Заман келсе сынарма ёлюм,
Жилямукъдан толур да кёлюм,
Топуракъда жатар тёрт саным,
Къабыр къысар да, жиляр жаным.

Тилейме кечгинлик Аллахдан,
Тюнгюлтме Сен жаратхан жандан.
Анда уа къалайды жолубуз?
Этгенмиди хайыр къолубуз?

Кеч… Уллу Аллахым, кеч бизни, 
Жаратханса кюн-кечебизни,
Жерни юсюн, баргъан сууланы,
Бийик тауланы, долайланы…

Кеч гюняхларыбыз ючюн да,
Кёрдюк бирде алдау кючюн да.
Жюрегим а, ура тынгысыз,
Болурму бюгюнлюкде кирсиз?

Нек этебиз да дау жашаугъа?
Не сюе болурбуз андан?
Берди Аллах сыйлы ашлаула,
Билебизми аны биз саудан?

Байтуугъанланы Исмаил