Жаным къурман болсун санга

ЖАНЫМ КЪУРМАН БОЛСУН САНГА

Чегем! Сыладым хар ташынгы,
Кёлюм бла алай сюйдюм сени.
Таукел этдинг ёхтем жашынгы,
Къаяланы сюрдюм, ёрлени.

Чинар тереклеринги кёрдюм,
Алагъа да алгъышла этдим.
Сабийлигими да ётдюрдюм,
Артха къарай, ашыгъып кетдим.

Сууларынгдан къаналмай жаным,
Кёп тургъанма суу жагъалада.
Унутма мени, Чегем тангы,
Айтама сени алгъышлада.

Атам бла бичен ишлегеним
Бир заманда кетмез эсимден.
Бизни къыйнамай кюрешгенин
Тутарыкъма мен жюрегимде.

Къум болгъан жолла бла энишге
Юй таба баргъан заманларым.
Тюзеле бара эдик ишге,
Терк барадыла сагъатларым.

Анамы жылыулу къоллары
Бюгюн башымы сыладыла.
Айланч-къыланч болгъан жолларынг
Тансыкъ этдиле, къыйнадыла.

Ыннамы бизге къайгъыргъаны,
Алгъышы да тюшдю эсиме,
Зикирле айтып окъугъаны,
Тынчлыкъ тилей мени элиме.

Няняны мында асырадым,
Аппам да тюшдю сууукъ жерге.
Ол ачыугъа тёзюп жашадым,
Ыспас этдим бу ариу элге.

Мында ёсдюм, кетерме мындан,
Ашым-ташым мында этилир.
Санга салам бере жанымдан,
Садакъам да элде этилир.

Байтуугъанланы Исмаил
2026 ж.