ИЙНАН
Менден иги болурму санга адам?
Жюрегими ачып, келгенме алай.
Не этейим сукъланырча сау алам?
Юйренмедим кёзбау эте не алдай.
Сени ючюн от юсю бла ётерме,
Жолларымы шынжырла бла жапсала.
Керек болса жанымы да берирме,
Умутларым санга изми тапсала.
Бир тырнагъынг ачымаз ючюн сени,
Жашаууму берир эдим саулайын.
Сен а, жаным, сюялырмыса мени,
Жюрегингден юзюп атып дауланы?
Сен кёлюме тийген чакъла эсимде,
Жюрегиме окъ бла ургъанча, алай.
Жанынгдама керек болгъан кюнюнгде,
Ыразыма, умут жолунда атлай.
Ыразыма санга, билип тур аны,
Кечгенме ортада жюрек къыйынны.
Кюзгюню уа бармыды бирси жаны,
Артха жолу жокъда озгъан ыйыкъны?
Байтуугъанланы Исмаил
Ийнан
© Copyright: Исмаил Бейтуганов, 2026
Свидетельство о публикации №126013105205
Свидетельство о публикации №126013105205
Рецензии