ДАГЪЫСТАН
Кёп халкъланы нарт уясы Дагъыстан,
Жигитлени, алимлени ёсдюрдюнг.
Жюрегиме жууукъ болгъан Дагъыстан,
Адамынгы бийиклеге кётюрдюнг.
Гамзатовну огъурлу жерлеринде,
Кеси юйюмдеча, алай айландым.
Жылыулукъ ала аны этегинде,
Кеси жеримдеча, алай жашадым.
Адамынгы намысларын да кёрдюм,
Цаданы да кеси элимча сюйдюм.
Тобот чучхурлары келдиле ёрню,
Алагъа, Чегемде болгъанча, кюйдюм.
Тау башында Гуниб элге сукъландым,
Мында жюрегиме асыулукъ алдым.
Ахмедовну туугъан элине бардым,
Бу жерлеге жууукъ болгъанлай къалдым.
Фахмулу адамла берген Дагъыстан,
Энтта ненчасы тууарыкъ болурла?
Манга керти тенгле берген Дагъыстан,
Таза жеринги амандан къоруула!
Байтуугъанланы Исмаил
Поэт, жазыучу, кёчюрмечи
Дагъыстан
© Copyright: Исмаил Бейтуганов, 2026
Свидетельство о публикации №126013105172
Свидетельство о публикации №126013105172
Рецензии