Ана тилим, сен жаша да, жашна,
Салам бер къартынга,жашынга.
Сюйгенлеге айтдыр ийнарла,
Ана тилни кючюн сынарла.
Поэтлеринг назмула тагъа,
От жагъада жюрек от жагъа.
Таулу алгъыш айтылсын юйде,
Къууанч келсин хар бир кюнюнгде.
Жюрек бакъгъан ариу -жомагъым,
Сенде ёссюн къызны омагъы.
Халкъ жигитлери, батырлары —
Сёлешгендиле сенде бары.
Ана тилим, тёр болгъан тилим,
Айдан, кюнден да толу тилим,
Этгенсе бир Беш да Тау Элни,
Сёлешдире кёк бла жерни.
Сен тюрк тилимсе – алтын тилим,
Сен – жауубузгъа къаты тилим,
Бай тилим – къаяла аязы,
Сен манга – кишилик ауазы.
Аллах берген ариу тилим – сен
Ёмюрлеге болуп тур эсен.
Сенде бешик жыр айтды анам,
Алгъыш этди да, жолум – сыйдам...
Ана тилим
© Copyright: Исмаил Бейтуганов, 2026
Свидетельство о публикации №126010904818
Свидетельство о публикации №126010904818
Рецензии