Чидачир чи дидейриз,
Ихьтин йикъар къведат1а,
Ксун тийиз йифериз,
Зегьмет ч1угурд я гьарда.
К1валера пични амач,
Ц1ай туна яру жедай,
Сала памадурни хъач
Цазамач жуваз недай.
Хьанва къе вири мучхул
Телефондал гъилевай,
Жибиндани ава пул
Гьар аялдиз ганавай.
Кьелеч1 п1узардиз къимет,
Са иердиз аквадай,
Амач гила. Я адет,
Ялар туна, дак1урдай.
Кварни амач к1валера
Булахдилай яд гъидай,
Гила вири хуьрера
Ятар ава заз чидай.
Гьак1 ят1ани сусари
Шегьер к1ан я лугьузва,
Сеймишни тийиз къари,
Нисиндалди ксузва.
Галат хьана лагьайла,
Вуч авуна на лугьуз,
Тара гамар авайла,
Вучдай вуна чи ч1авуз?
Пекни партални вири,
Чуьхвейди я гъилерал,
Вакайни жеда къари,
Свасни жеда генерал.
Сусариз
© Copyright: Сельмина Курабекова, 2026
Свидетельство о публикации №126010600712
Свидетельство о публикации №126010600712
Рецензии