Чи лезгийрихъ хьанай са хва,
Къуват авай пара зурба.
Шарвили т1вар ганай адаз,
Ч1ехи хьанай акваз-такваз.
Пуд йис хьанмаз хвенай нехир,
Агуд тийиз вагьши, нечхир.
Дагъдин ц1егьер, миргер ягъиз,
Кесиб халкьдиз як1ар пайиз.
Гьуьрмет хьанай Ахцягь хуьре,
К1вал эцигнай К1елед хиве.
Лезги халкьдиз тир ам машгьур,
Кас бубади гатанай тур.
А кьадар тир адан къуват,
Санал ярхриз яцар са вад.
Вац1арилай хкадардай,
Уьфт1 ягъиз раг ацадардай.
Ахцягь, Куьре чаз хьуй лугьуз,
Хаин душман атай ч1авуз.
Лезги халкьдиз эвер ганай,
К1ват1най кьушун,гьарма санай.
Женгиниз ам фенай бирдан,
Гьална вичин юргъа балк1ан.
Хуьда лугьуз лезги халкьар,
Тахьуй лугьуз абур лук1вар.
Эхирдалди гьалнай дяве,
Кьил, пайдах хьиз, кьуна вине.
"Гьура" гана,хкажнай тур,
Катнай душман ам къвез акур.
Хайи ватан хьанай азад,
Хтаначир душманар мад.
Гьа йикъалай лезги чилел,
Хъхьайди туш душманрин гел.
Шарвили
© Copyright: Муслим Арсенович Идрисов, 2025
Свидетельство о публикации №125122703156
Свидетельство о публикации №125122703156
Рецензии