Хайуанланы сайлаулары

Бир хайуан къралда,
Джаныуарла, эригиб,
Тамада айырыргъа
Оноу этиб, биригиб,
Сайлау этиб бегитиб,
Чёб атаргъа дедиле.
Беш кандидат келдиле:
Сау къралгъа белгили
Аслан бла сурахай,
Айю, эшек, ол огъай,
Гугурук, этиб хахай,
Алгъа атлаб тебреди.
"Мени ауазыма- деди-
Саулай кърал тынглайды,
Мен къычырыб башласам-
Танг атханын англайды.
Мен болсам тамадагъыз,
Айтханымы этерсиз,
Кюн батханлай барынг да,
Сиз джукъларгъа кетерсиз!"

Ызындан айю келди,
Айтырым ма бу деди:
"Къарыу бла меннге къаршчы
Барлыкъ блайда болмазсыз
Мени этсегиз башчы-
Сиз джауладан къоркъмазсысз.
Дагъыда бир къошарым-
Эшитмеген болмазгъа,
Мартла-гуртла кетгинчи
Тынчлыгъымы бузмазгъа".

Аслан чыкъды сахнагъа
Башлай кесин махтаргъа
"Тюзюн айтсам, сайлауну
Санамайма огъургъа
Тохана мени орнум
Тыйыншлыды болургъа.
Бабам -патчах, мен- патчах
Байны, бийни джашыма
Тамада менден башха
Ким болур- деб сагъышлыма".

"Мен сурахай- эм мийик
Бугъуналмаз, джур, кийик
Барын да кёрюб турлукъма
Терсни мен тюзге бурлукъма"
Узунбоюн сурахай
Узакъдан хапар айта,
Аякъ тюбюнде уа асхай,
Бир кючюк къансыб джата.

Бары айтханнга тынгылаб,
Эшек келди джоргъалаб.
"Менден сора болмазды арагъызда акъылман
Мен болмасам ким барды ичигизде окъугъан?
Мен барсам аллыгъызда
Аджашмаз, рахын, сокъур
Мычымай арбазлада
Халкъ мени кибик окъур."

Беш кандидат- бары да
Болумларын айтдыла
Джаныуарла арада бирер чёбню атдыла.
Сагъыш этмей, хайуанла,
Окъугъанны сайлалла.