***

Муса Желил
Вагьшивал

Абури...Абури дидеяр,
Аялар чукlурна са чуьлдиз.
Фур эгъвез вугана, вичерни
Къерехда акъвазна гьиргьириз.

Ахпа кlватlна фурун къерехдал
Къуватсуз ва гьалсуз фагъирар.
Атана яцlу нер
квай майор,
Набутвал тир цурун вилера.

Къвазвай югъ тир, хуртlар гуз сециз,
Куьрс хьанвай цаварай чилерал
Кьуркьушум булутар...
Ваъ, и югъ,
Алатич садрани рикlелай!

Заз чпиз акуна аял хьиз
Шехьзавай вацlарин накъварни.
Цава цlайлапанри къукърумна,
Зурзуна хайи чил, накьварни.

Зи вилиз акуна, циферай
Суьзмуьшна эвичlна пашман рагь.
Чинра ранг амачир аялриз
Эхиримжи сефер ийиз пlагь.

Дердинай, гъазабдай зулун там
Агъвана, тарарик кутаз ван.
Лап са квай мегъуьн тар дувулдай
Акъатна, зурбунай хана тан.

Аялар кичелай чуьнуьх жез
Дидедин валчагдин цениник,
Гуьлледин ван къвезва...са диде
Якъалдна, къаргъишар кваз сивик.

Зулун пеш хьиз хъипи аялди
Дидедин кlвачера чуьнуьх жез
Жегьдзава, зурзазва кичlела,
Жагъизвач кьил твадай гъвечlи гез.

Кикlизва хурудкай дидедин,
Якъин хьи, жедайди гьиссава.
   - Чуьнуьха зун, диде, чуьнуьха,
Кlанзавач, кlанзавач рекьиз заз.

Дидеди кьве гъилив, хьана къат
Къачуна чилелай хкажна,
Жаллатдин гъилевай автомат
Абрун лап къаншардал акъвазна.

Аялдин кичl ава вилера,
Датlана ава ам минетиз:
  - Ахъая, чан диде, ахъая,
Къиймишмир, кlанзавач заз рекьиз.

  - Гьич кичlе жемир, чан дидедин,
Фад жеда, са тlални жедач ваз.
Чуьнуьхмир, хкажа жуван кьил,
Кучудиз тахьурай чан алаз.

Кlевирна бицlекди кьве вилни,
Яру банд хьиз иви хьана туьд.
Хандакlдиз аватна, ккlай хьиз
Сасадан къужахда, кьве мейит.

Яна цlайлапанар цавара,
Шехьна чил стlамдин тlалунай.
Вуч я и аламат, хайи чил,
Вучиз вун ава и гьалуна?

Милйон сар цуькверин къене вун
Яшамиш жезава дуьньядал.
Тек садра вал жуван уьмуьрда
Хьанани расал и вагьшивал?

Ватан зи, ягъияр атанва,
Хкажа пайдагъар на гьахъдин.
Ивидин накъвари чуьхуьрай
Адан чил, акlуз хьел пайдагъдин.

Къуй аман тагурай душмандиз,
Рекьирай пехъи а вагьшияр.
Гьатнавай гунагьсуз аялрин,
Дидейрин ивидин кашина...
22.05 2025