Рагъ аватай айвандин чилел ацукьай,
Дидед рик1ел жегьил вахтар хквезвай:
"Бедбахтвилер къати гарар я галукьай,
Уьмуьрда чарх гуз,чалай элкъвезвай.
Четинвилер акуна жегьил ч1авалай,
Аялзамаз векъи хьанай гъилер зи.
Тамун ц1амар пара фенай к1улалай,
Лампадин ишигъди кудай вилер зи.
Балаяр гъвеч1идайла ,жедай зегьмет,
Вири азиятдин пар жува ч1угуна.
Чир хьайилани дуьньядин къимет,
Куьзуьвили винел пад къачуна"
Мич1и келегъадикай хкатнавай ч1арар,
Шагь дагъдин рехи к1ук хьиз аквазва.
Диде рахазвай ялавлу ч1алар,
Язух къвез,гьайиф рик1е акьазва.
Масан диде нефес дар жез рахазва,
Назик гъилер вичин мет1ел эцигна.
Ракъин нурар адан чинал къугъвазва,
За зи диде къизил зулухъ гекъигна.
Диде
© Copyright: Роза Белая 777, 2025
Свидетельство о публикации №125120306364
Свидетельство о публикации №125120306364
Рецензии