Куьренни юргъа

КУЬРЕННИ ЮРГЪА

Зи бубадиз кьве шив авай иер тир,
Садан Юргъа, муькуьдан т1вар Куьрен тир.
Гьар балк1андихъ абурарни бул авай,
Гьардахъ вичин кьет1енвални т1ул авай.
Куьрен умун, рекье фидай балк1ан тир.
Юргъади кам къачудачир так1ан тир.
Адахъ вервец1, кьакьан, шимал буй авай.
Такабурлу дамахар квай суй авай.
Нагагь вичиз акурт1а са так1анвал,
Лам хьиз жедай, квахьна михьиз балк1анвал.

Гьазур хьанвай буба къунши Къубадиз,
Пурар яйна ада вичин Юргъадиз.
Амма Юргъа чкадилай юзанач,
Мад бубадиз са уюнни жагъанач.
Терс балк1анди вичин хесет къалурна,
Къван хьана ам, дабан чиле ак1урна.
Налугьуди тимтал тир ам чахмахдин,
Ишиннавай хемирдалди дамахдин.
«Идакай къе хийир жедач», – лагьана,
Куьрендиз фад ада пурар хъияна.

Гьа Юргъадин къилих ийиз къехуьнар,
К1валинбуру ийидай зал хъуьруьнар.
Хъелай ч1авуз лугьудай заз дидеди:
Юргъади хьиз хъелнава къе бикеди.
Гаф къачудач, гуя серкин силих я,
Хуп1 агъайна дамахар квай къилих я.
«Эхь, Юргъадин къилих гена заз хуш я,
Жуваз лайих чка чидай зун руш я!
Гудат1ани иесидиз хажалат,
Багьа я заз даим гьахъни адалат».