Мажара

Са рушакай ахъайин квез мажара,
Дертэгьли яз кьуразвай а фугъара.
Югъ къандавай андан кефи ч1ур жезвай,
Хибри хьана зигьинни кваз кур жезвай.
Шадвал квахьна чинни адан ч1ур хьанвай,
К1валикайни адаз мич1и сур хьанвай
Малум тушир вучиз ят1а т1азвайди,
Ам вуж тирт1а адан иви хъвазвайди.
*Гьалдарзавай гада свасал дидеди*
Агъавализ куьтягь тежер фитнеди.
Вуч ават1а гьич садазни чизвачир,
Амма сваса хзандин сир гузвачир.
Эх тахьана, кьулан фериз катна руш,
Дагълар галай патахъ рекье гьатна руш.
Турди хьана кьве ц1ар ада вичелай,
Экуьнахъди к1елна гъуьлуь чарчелай:
“Куьн захъ къекъвез зи гуьгъуьнай къвез тахьуй,
Гьайиф къведай кьасар ийиз шез тахьуй...”
Килигайт1а акунвай кьван ахварай,
Вичиз, дарман авайди а дагълара.
Сифте кьиляй рехъ ат1ана кьезилдиз,
Пуд югъ, пуд йиф фена хейлин мензилдиз,
Кьуд лагьай югъ, физвайла ам къурухдай,
На лугьуда, хьайиди я кьасухдай,
К1вач к1вачихъди хквезмачир галатна,
Мад физ хьанач ам ярх хьана аватна.
Вич -вичелай фидалди са уьтери,
Ван атана элуькьзавай киц1ерин.
Умуд хьана чубандиз ам аквада,
Чилел тадач, мейит чилик кутада.
“Дуьньядихъ вил галамаз зун фейит1а,
И дагълара хьурай зи сур, кьейит1а”,
Ик1 лагьана квахьна руш вич -вичикай,
Хъуьтуьл тир мес хьана адаз чиликай.
Киц1ер фена а чкадал гел кьуна,
Чубандизни ярх хьанвай руш акуна.
Кьенвачир ам, ада нефес къачузвай,
Хкажна фад, тунач чилел ламузвай.
Тади гьалда хкажна геж тавуна,
К1арабрин гъаб къазмадиз ял хъувуна.
Кутуна руш тадиз ада кавалдик,
Хкудиз к1анз ам пацукай ажалдин.
Ахпадалди вегьенач, геж тавуна
Ц1егь тук1уна, туна ц1егьрен хамуна.
Хъвана, авур векьерикай дармандин,
Кумаз -кумаз, чай гъилелай чубандин.
Са гьафтедлай къарагъна руш меселай ,
Чухсагъулдин гафар къвезвай мецелай.
 Гьисна руша маса дуьнья хьайиди,
Чубан гадад  ц1ийи уьмуьр гайиди !

“-Гила за вун хуьруьз рекье хутада,
Ви хайибур шад жеда, вун аквада.”
“-Ваъ”,-лагьана рушан мецел атана,
Давам хьанач, чубандин гаф ат1ана.
Амукьунихъ адан вилни галазвай,
Руш к1ан хьана лугьуз тежез кьуразвай .
И дагълара гьамни тек тир, сефил тир,
Ялгъузни тир чагъиндавай жегьил тир.
Куьмек гузвай руша адаз к1убандиз,
Свас хьун кьет1на ада вик1егь чубандиз.
Пак муьгьуьббат кьве патани гьиснавай,
Икьван гагьда лугьуз тежез киснавай.
 Эхир руша вичин рик1е экв туна:-
“Зун санизни хъфидач вун тек туна ,
За кьин кьазва, и дагъларизни ван хьуй,
Ваз вафалу тахьайт1а зун са къван хьуй!
Кхьена чар, чубан рекьив агудна
 Рушан буйругъ ада кьилиз акъудна.
Хабар гана вичин диде -бубадиз,
Ша лагьана чеб кьвед авай чкадиз
Мехъерикди зазни хабар атана,
Фена зунни дагъдин рекьер ат1ана.
Эрид юкъуз зуьрне далдам гатана,
Абур гьана, чунни хуьруьз хтана...