Тарс

Хъсанвал алатдач рик1елай ,
Ери я дат1ана виневай.
Зар фидач , алахьдач мецелай,
Ширин гаф рахайдан, сивевай.

Куьмек гун чи къанун ,чи адет.
Рик1елай физва ам бязидан ,
Квевай за къачуна и хесет,
Уьмуьрлух тарс хьана ч1ехидан.

Куь гъилин ктабар чешмеяр,
Булахар гьамгадин яд авай .
Куь крар чаз даим чешне я,
Устаддин,камалдин чад авай !

Тарихар галк1урун пакадихъ,
Къаст я ам Фейзудин бубадин
Къула ц1ай, чимивал акадихъ,
Гьар са лезги хуьруьн-убадин !

***
КХЬИХЬ, ШАИР

Заз чизва ваз къвезвач кьарай,
Дигмиш хьанва хура гьарай,
Хиялрикай рик1е чрай,
Кхьихь жуван гьиссерикай.

Кхьихь, шаир, ая ви т1ул,
Къалур ая гьахъни бат1ул,
Мални девлет ават1ан бул,
Вил тац1узвай невсерикай.

Гьич са касни текъвез язух,
Гьикьван хьайт1ан тежезвай тух,
Кхьихь, шаир, къвазмир кьулухъ,
Иви хъвазвай хенц1ерикай.

Вичин рехъди физвай карван
Тадач лугьуз, кутуна ван.
Такваз ч1уру гьахъни дуван,
Элуькьзавай киц1ерикай.

Билбилар хьиз рахар тарай,
Руфун дулу хьайла, кьарай
Кьаз тежезвай, ийиз гьарай,
Кхьихь зилчи циц1ерикай.

И дуьньядин хъсанни пис,
Ягъ сафунай, жемир вун кис,
Ватандикай ваз микьнат1ис
Гьик1 хьанат1а, сирерикай.

Рик1из къайи гаф я дяве,
Кхьихь, тамир жуван хеве,
Гьатай ч1авуз Ватан к1еве,
Муьхце гьахьай кацерикай.

Хьанвайбур чеб гьар са патан,
Какахьнавай гъурбат, Ватан,
Руьгь амачиз пич1и тир тан,
Ч1ал кьуранвай мецерикай.

Аватнавай халкьдиз виляй,
Сарар жакьваз абрун хъиляй,
Вегьиз тахьуй къелем гъиляй.
Кхьихь, шаир, пехъерикай.

Хуьзвай чпин ери-бине,
Хайи диге кьазвай вине,
Милли гъери авай к1ане,
Кхьихь ч1ехи рик1ерикай.

Гияр, Ахцегь, Дербен, К1еле,
Убани хуьр, гьар са магьле,
Дидедин ч1ал хуьзвай к1вале,
Кхьихь, шаир, лекьерикай.

Эгер ят1а халис шаир,
Аян жеда, жеда ваз чир.
Кхьихь вуна, яз тамир сир,
Пакад йикъан экверикай.