Хайи чил ви рикlикай заз хабар я
Шадвилерни хажалатар санбар я.
Кьуд патава чкlена ви балаяр,
Туна фейибур паласаяр, талаяр.
Къулай ятlани гъурбатдавай маканда,
Зи рикl ава даим хайи ватанда.
Гьамишанда вахъ цlигел я масан я,
Вун зи рикlел алайвиляй кlубан я.
Зи вил гала ви баркаван Накьвадихъ,
Куьрпе тирла нефес чlугур гьавадихъ,
Ви Ккlалрихъ кьуьнтер, метlер алудай,
Бубад багъдихъ, шафран ичер атlудай.
Гьина хьайтlан рази я вал, гьейран я,
Ви къужахда чlexи хьайи жейран я.
Вун абад хьуй лугьузва за датlана
Берекат хьуй лугьузва, сив ацlана.
Лугьумир на ви руш вавай къакъатна,
Вафасуздин зун рикleлай алатна.
Кlанда вун заз зи намусдин гуьзгуь чил,
Зи играми багъри гуьзел лезги чил.
Хайи чил
© Copyright: Беневша Тайгунова, 2025
Свидетельство о публикации №125112103987
Свидетельство о публикации №125112103987
Рецензии