Тумгьо данани -семена знаний-

                стихотворение на языке
                джуури

Э ишкуле нубодорегоргьо
Гуьрделеме гуьрди эз сер себэхь -
Чуьтам бири ге,  еки эз угьо
Четине хундогор берде э рэхъ.
Деде-бебе гIэилгьой хуьшде берде,
Э Азаряев класс  гировунде.
И чуь боло омо, чуь биёбури -
Се класс тиини,  еки пур-пури.

Сервор э и школе, зен екем чогъ,
Гуфти: "Нинере исти е сурогъ!
Те ме омо эз жогьобдор деде,
Э сер гIэйлгьо у чуьниге шенде!
У пэхьники сохтембу э синиф
Кисе - у фурмундебу коллектив.
Те ме омо эз екигей гъоиде -
Э у кисе Нине тумгьо гуьрде".

"Э гIэилгьо му чуь  сохде?  Чуь тум?
Биё бурайм э хуней эн и мэгIлуьм.
Биль мигую, чуьтам у бинесуьз
"Верзуьшлуье мэгIлуьм" берди е руз".
Дузире данусде не руй дире
Эз ишколе оморут э гуногъ,
Пенж зе поистуьд эй кура бире,
Энжэгъ, е чи веди небу - бейдогъ.

"Хош оморейет зео э и дури, -
Нине эз пенжере огол зери. -
Э гъэд хуне дарайт, чой мухурим,
Пушой гъунший ме не бу бьёбури".
"Экишму эекиму оморейм
Войгейму овурдейм, гьечинево,
Иму, корсохгьой ту, данустейм
Тум данани шендени э гIэилгьо".

"Гуьрдейт мере, зенгьо, сер ишму согъ,
У туме ейшму эй сагIэт  мидуьм,
Гуьзет сохит мере э и чордогъ,
Тум данунде э инжо миёрум".
Зенгьо венуьшт э зир раче чордогъ,
Сие онгур дуллу бу эз зевер.
"Ки гуфтире бу кор иму ногьогъ?
Имурешь биль бехш соху бэхтевер!"

Нине омо, э дес эну почке,
Хэтнуьвуьси биней эн у "Сечке".
"Сечкеи и? Атоше дешенде,
Вэхт нист имуре зарафат сохде".
"Ме симанту сохденум эй ишму,
Чуь хуб хунде нумгьо э уруси .
Зерди ю винит, ме бошит пешму,
Хуб винит туме, те бире гIоси.

Бэхш сохит и почкере тен-бе-тен.
Тумле шендени ге, войгей туь гир.
Эз се минут, чуь туьре воисте -
Корсох не агъулменд бире гIэил.
Дье бурайт э хуне, гьемкоригьо,
Сурогъ мере данустит имогьой!"
Зенгьо рафти,  жендегъ Нине жуьмуьсд. -
Ду-се сэгIэт ханде бу у те суьсд.

Песде, ме эйшму гуюм чуь бисто,
Зенгьоре, э хуне омореки,
Весс не сохди сабур не сокити
Тумгьо гIэилёре шендут э мердо.
Вогьней и сохдиёре, белкине,
Мердой фурулдогъгьой зенгьо тануст,
Гуфти гьигьо: "Чуь рач сохти Нине,
Эй бэхилгьо нубо дори гIэрус".