Инсаф ая зи чан, Фелек!

Инсаф ая зи чан, Фелек, гунагьрикай к1вал хьана заз,
На халкь авур гуьзелдикай эрзиман марал хьана заз,
Беневшадин хъвайи кьадар ширинвал ст1ал хьана заз,
Тахсир квачиз са к1ус кьванни, и кар гил хиял хьана заз.

Инсаф ая зи чан, Фелек, фейжандикай дуст хьайила,    
Беневшадин гьисерин к1унч1 фикирдаваз суст хьайила,
Ви лук1 лугьуз, эдеб хвена, са к1ус гьаясуз хьайила,
Дуьз яни им, я чан Фелек, рик1еллачир т1ал хьана заз.

Инсаф ая зи чан, Фелек, са буйдал гьейран хьана зун,
Шербетдивди ац1ай, къизил цуькведиз мугьман хьана зун,
А цуькведин гьал акурла, к1анз-т1ак1анз мазан хьана зун,
Гьаясузвал бахт хьайила, вучиз ишел-хвал хьана заз.

Инсаф ая зи чан, Фелек, зи гьал мадни залан хьана,
П1узаррилай шербет хъвайи, цуьквер кьула пиян хьана,
Мергьеметлу инсандикай зи дердерин лукьман хьана,
Гъейрибуру хвешивализ, бегьем дарискъал хьана заз.

Инсаф ая зи чан, Фелек, тахсир-себеб чир хьана заз,
Ажайиб са жейрандикай, гуьзелвилин п1ир хьана заз,
Кьарай квахьна ацукьнава, ийидай кар сир хьана заз,
Инсаф ая зи чан, Фелек, им вуч гьал-агьвал хьана заз.