Геж ахварай аватна ам

Экуьн сегьер, гуж-баладив яргъарай
Хтанмазди гьахьна к1вализ мич1и тир.
Фикирна хьи: диде ама ахвара.
 Амма къайи к1валин гьалар ич1и тир…

Начагъдаказ месе гьатна дидеди,
Вилив хуьзвай вичин ширин балаяр.
Садни хьанач, чан тухурла вядеди,
Адан патав: кьилин ийиз багьнаяр…

Шехьиз-шехьиз сел авахьиз вилерай,
Тади ийиз, аладна ам сурариз.
Гъамлу сесер низ атурай, эверай?
Фейит1ани к1ани кьвадар, цавариз.

Кьеженвай сур къужахда кьаз кесибди:
- Чан диде, чан! - лугьуз ишел-хвалзава.
Белки адаз гужар гузва айибди,
Намусдини мажбур ийиз, къалзава.

Геж ахварай аватна ам: аялри
Тарс авунай бубадин шит амалар.
Квахьна умуд, гъамлу ийиз завалри,
Физва рик1яй агъзур жуьре хиялар…

Рик1елай фин, кинарзавай туп1арин
Назик юзун дидедин, им азар я?
Вири жеда эхир-к1вале сурарин,
И дуьньядал амукьарди са т1вар я.

Т1вар багьа я, квахьда вири девлетар,
Хатур хамир дидедин, квез минет я!
Чан аламаз ая адаз гьуьрметар,
Амукьарди тахьайт1а гъам-хифет я.