Диде чан, хва гьатнава ви к1евера.
- Ви дерт вуч я? – лугьуз, на заз эвера
Азизди, зи хажалатар пара я,
Ви ширин сес зи дердиниз чара я.
Аял вахтар етимдаказ акъатнай,
Агъур пар ви зайиф к1улаз аватнай.
Йифизни вун тефиз секин ахвариз,
Ирид балад кьилихъ хьанай кинариз.
Рахазва зун, диде, вав гьар сеферда,
Вахт хьаначир, гьайиф, заз вун туьмердай.
Ви жафайриз фикир тагуз къар фена,
Гил и дуьнья, диде чан, заз дар хьана.
Вири аваз рик1евайд са ишел я,
Аман физва ви сесинихъ ц1игел яз.
Суза ийиз, кефияр мад ч1ур хьана,
Заз экуь югъ ч1улав хьанва, сур хьана.
Ви дердияр зи кьисметда пар хьана,
Герек ч1авуз ви рик1 закай т1ар хьанай.
Гьарайналди ван къвезамач диде ваз,
Чидайт1а за чанни гудай диде ваз!
Акъвазнава мет1ерал зун, ялвариз,
Шехьиз-шехьиз, гьарайзава цавариз.
Заз амайди, диде чан, гъам-хифет я,
Зи тахсир я, гъил къачу, ваз минет я.
Дидедиз
© Copyright: Магомед Мирзоев Мирзой, 2025
Свидетельство о публикации №125101801777
Свидетельство о публикации №125101801777
Рецензии