***

«САБАНТУЙ»


Набережные Челныда заз,
Мукьва-кьилидаз мугьман яз,
Татар элдин суй акуна,-
Къадим адет, хуьзвай багьа,
Сувар- «Сабантуй» акуна.


Сувар патал шумуд жуьре,
Ч1агурна *зизикрин къене,
Мярекатрин, майдан, сегьне…
Вижеваз гьазур акуна,
Сувар-«Сабантуй» акуна.


Алай милли гинибашар,
Чиг гадаяр, иер рушар,
Тамамриз кьуьлер, манияр,
Заз халкьдин абур акуна.
Сувар-«Сабантуй» акуна.


Чамарардай гегьенш майдан,
Къанниц1уд кьван жегьил-жаван,
Гьардав вичин юргъа балк1ан,
Бягьс  ч1угваз, къив-гьуй акуна.
Сувар-«Сабантуй» акуна.


Майдандин юкьвал пая-т1вал,
Пишкеш ала паяд кук1вал,
Къачун патал жезвай мукьвал,
Вик1егь, циц1и буй акуна.
Сувар-«Сабантуй» акуна.


Гьасиралла  пагьливанар,
Кьазва абру кьуршах-юкьвар.
Садбуру  хкажиз путар,
Гъилин къуват-зур акуна.
Сувар-«Сабантуй» акуна.


Шегьер-эгьли  муькуь халкьар,
Кьиле аваз жемиятар,
Шад яз, сад яз, рик1ин къастар,
Заз гьуьрмет, хатур акуна.
Сувар-«Сабантуй» акуна.


Я мугьман тир, шаир Фикрет,
Суварик хьун хьана кьисмет.
Лезги  жемиятди, гьелбет,
Кутур дем машгьур акуна.
Сувар-«Сабантуй» акуна!


*Зизик( кар) – безек(кар)


2009  Июнь.